Við erum sammála

...um að sækja eigi um aðild að ESB

Við erum sammála um að hagsmunum íslensku þjóðarinnar verði best borgið innan ESB og með upptöku evru. Þess vegna viljum við að þegar verði sótt um aðild að ESB og gengið frá aðildarsamningi þar sem heildarhagsmunir þjóðarinnar eru hafðir að leiðarljósi.

Sjá www.sammala.is

Athugasemdir

[Árni Richard (IP-tala skráð) 27.3.2009 kl. 21:02]

Sammála.

Árni Richard Árnason

Stærð- og tölvunarfræðingur

[Hólmfríður Bjarnadóttir, 27.3.2009 kl. 23:05]

Er þetta ekki síða þar sem hægt er að skrifa undir eða hópur sem hægt að ganga til liðs við. Ég er sammála þeim texta sem þarna er skrifaður og það er bjargföst samfæring mín að við eigum að sækja um aðild að ESB strax að loknum  kosningum og myndun ríkisstjórnar

[Hólmfríður Bjarnadóttir, 27.3.2009 kl. 23:09]

Sammála Hólmfríður Bjarnadóttir frumkvöðull í ferðaþjónustu.

[Vilhjálmur Þorsteinsson, 28.3.2009 kl. 00:12]

Þakka undirtektirnar, Árni og Hólmfríður.  Sendið tölvupóst á [e-mail] og ykkur verður bætt við listann.

[Atli Hermannsson., 28.3.2009 kl. 00:22]

Við erum sammála. 

En að láta kjósa fyrst um það hvort þjóðin eigi að fara í aðildarviðræður við ESB eins og Sjálfstæðisflokkurinn leggur til er þvæla. Því skoðanir almennings eru sífellt að breytast. Þær geta t.d auðveldlega tekið breytingum eftir fyrirsögnum í dagblöðum milli vikna og því hversu vel andstæðingum aðildar gengur að koma hræðsluáróðri sínum á framfæri. Þá geta ritstjórar dagblaðanna einnig leikið sér að því að "teikna" það sem þeir vilja á útsíðurnar vikurnar fyrir kosningarnar og haft þannig bein áhrif í þá átt sem þeir vilja.

Það er ekki fyrr en eftir aðildarviðræður sem raunverulega er hægt að taka endalega afstöðu. Staðreyndum málsins verður þá milliliðalaust hægt að koma fyrir á einu A4 blaði sem flestir ættu að skilja. Þá fyrst verður hægt að afhjúpa hræðsluáróður íhalds- og afturhaldsaflanna sem áfram krefjast einka afnotaréttar að þjóðinni - fyrir sig og sína.  

[Helgi Jóhann Hauksson, 28.3.2009 kl. 02:14]

Já og ég er líka sammála.

Ábyrgð okkar allra sem vitum að verið er að hræða og blekkja fólk með hræðsluáróðri gegn ESB er umtalsverð að svara af fullri einurð og krafti. Annars leyfum við að þessi þjóð sé í fáfræði sinni, hroka og rembingi að dæma sig til einagrunar og meiri fátæktar sem að lokum, og jafnvel fyrr en varir, raunverulega sviptir hana sjálfstæði sínu.

[Sigurður Hrellir, 28.3.2009 kl. 08:56]

Því miður geta hvorki Sjálfstæðisflokkur né VG tekið af skarið og boða ýmist "bíða og sjá" stefnu eða þjóðaratkvæðagreiðslu um að hefja viðræður. Það er auðvitað sárgrætilegt að landinu sé stjórnað af svona ákvarðanafælnum fyrirbærum. Borgarahreyfingin hefur lýst yfir að hún vilji fara í aðildarviðræður og fá þjóðaratkvæðagreiðslu um samninginn, að sjálfsögðu! Þetta ákváðum við jafnvel þó að sum okkar séu ekki hlynnt inngöngu í ESB. X-O

[Bobo i heimunum (IP-tala skráð) 28.3.2009 kl. 10:52]

Hvað með reglur EU um samkeppni og einföldun lagaumhverfis?

Er það ekki of stór biti fyrir t.d samfylkingu?

[Vilhjálmur Þorsteinsson, 28.3.2009 kl. 11:37]

Bóbó, skil ekki alveg hvað þú átt við.  Reglur ESB um almenna samkeppni og afnám samkeppnishindrana á mörkuðum eru að mestu þegar lögfestar á Íslandi í gegn um EES.  Varðandi "einföldun lagaumhverfis" veit ég ekki til hvers þú ert að vísa.

[Vilhjálmur Þorsteinsson, 28.3.2009 kl. 11:43]

Annars kemur Sjálfstæðisflokkur ekki á óvart í áframhaldi humm-og-ha stefnunnar í Evrópumálum, sem hann hefur aðhyllst í a.m.k. 14 ár.  Þetta er náttúrulega ekki stjórnmálaflokkur, heldur hagsmunabandalag um kunningja- og pilsfaldakapítalisma, og LÍÚ ræður því sem það vill ráða.  Að minnsta kosti meiru en Viðskiptaráð og Samtök iðnaðarins.

Finnst Sjálfstæðismönnum ekkert óþægilegur lestur að sjá nöfnin á www.sammala.is - forvígismenn nánast allra helstu vaxtarbrodda, nýsköpunar og sprota í íslensku atvinnulífi - Marel, Össur, Eyri, CCP, Auði Capital?  Hvaða sýn hefur þessi flokkur á atvinnulíf framtíðar á Íslandi?  Það er kannski freudískt að Loftur Altice Þorsteinsson formannsframbjóðandi vill fá íslenskan dal sem gjaldmiðil, það passar vel fyrir flokk Bjarts í Sumarhúsum.

[Helgi Jóhann Hauksson, 28.3.2009 kl. 15:19]

Í ofanálag þá er Kristján Loftsson og hagsmunir Hvals hf frekasta aflið í stjórn LÍÚ. Þannig að þegar þeir útgerðamenn tjá sig sem sjá að hagur þeirra er ekki verri í ESB en utan þá valta hvalveiðihagsmunirnir yfir þá með miklu afli.

[Héðinn Björnsson, 28.3.2009 kl. 15:43]

Ef þú ert sammála að þá ertu væntanlega á því að við höfum nægar upplýsingar til að taka afstöðu með eða á móti nú þegar. Er þá ekki full ástæða til að taka tvöfalda þjóðaratkvæðagreiðslu (t.d. samhliða stjórnlagaþinginu í haust) ?

Eða villtu sækja um aðild að ESB hvort sem meirihluti landsmanna er sammála þér eða ekki?

[Vilhjálmur Þorsteinsson, 28.3.2009 kl. 16:24]

Ég er sammála því sem kemur fram í yfirlýsingunni, að það sé borðleggjandi að fara í aðildarviðræður og kjósa svo um niðurstöðuna í þjóðaratkvæðagreiðslu.  Ég tel allar líkur á að hægt sé að ná hagfelldri niðurstöðu, þar sem kostirnir verði mun veigameiri en gallarnir.  Evran vegur þungt, en einnig ýmis stjórnsýslu- og stöðugleikarök, og vitaskuld að sjálfstæð þjóð á að taka þátt í ákvörðunum um framtíð Evrópu, en sitja ekki bara til hliðar eins og nú er í EES.

[Haraldur Ólafsson (IP-tala skráð) 29.3.2009 kl. 18:33]

Þessi auglýsing ykkar er vægast sagt döpur lesning.  Hvaðan kemur hugsanlegum meirihluta réttur til að ræna alla Íslendinga borgaralegum réttindum og gera okkur og afkomendur okkar að þegnum í herveldi gömlu nýlenduveldanna? 

[Frosti Sigurjónsson, 29.3.2009 kl. 18:38]

Aðildarsinnar hljóta að geta fallist á að betra sé að ná góðum samningi en slæmum við ESB. Samningsstaða okkar er mjög veik núna en verður sterkari eftir nokkur ár þegar kreppuni slotar. Við eigum að velja tímann af kostgæfni, aðild er til frambúðar og það skiptir öllu að ná góðum samningi.

Eða eru menn bara desperat og til í að taka hverju sem býðst?

[Haraldur Ólafsson (IP-tala skráð) 29.3.2009 kl. 18:47]

Nei, Frosti, aðildarsinnar vita að eina leiðin til að koma Íslendingum inn í bandalagið er að neyta lags þegar þjóðin er í tímabundnu annarlegu ástandi.  Innihalds samnings er aukaatriði, þjóðin skal seld hvort sem súpudiskur er í boði eða bara úldinn hafragrautur.

[Vilhjálmur Þorsteinsson, 29.3.2009 kl. 21:39]

Frosti, það hefur verið viðkvæðið hjá Sjálfstæðisflokknum í 14 ár að það sé ekki tímabært að sækja um aðild, það sé ekki brýnasta úrlausnarefnið sem stendur o.s.frv.  Ég tel að þessi roluháttur sé ein stærstu afglöp í nútíma stjórnmálasögu landsins.  Svo gæfulega sem það hljómar, þá eru þau sennilega til komin vegna aðdáunar Davíðs og Hannesar Hólmsteins á Margréti Thatcher, sem var tortryggin á Evrópuþróunina af breskum íhaldsástæðum, og svo vitaskuld blindri þjónkun við LÍÚ.

Haraldur, það má velta því fyrir sér hvort þeir valinkunnu, velupplýstu og ágætu Íslendingar sem eru á www.sammala.is séu upp til hópa landsölumenn og kjánar, eða hvort þeir hafi kannski einfaldlega rétt fyrir sér.

[Haraldur Ólafsson (IP-tala skráð) 29.3.2009 kl. 22:21]

Vissulega má velta ýmsu fyrir sér í sambandi við þetta valinkunna fólk, en spurning mín stendur eftir sem áður, hvaðan kemur þessu fólki réttur til að hirða af öðrum Íslendingum sjálfsögð borgaraleg réttindi og þröngva þeim í hernaðarbandalag gömlu nýlenduveldanna, ríkja sem þekkt eru fyrir allt annað en þjónkun við minnihlutahópa innan sinna raða? 

[Egill M. Friðriksson, 29.3.2009 kl. 23:29]

Haraldur: Kemur ekki fram að samninginn skuli bera undir þjóðina?

[Haraldur Ólafsson (IP-tala skráð) 30.3.2009 kl. 09:54]

Vissulega má velta ýmsu fyrir sér í sambandi við þetta valinkunna fólk, en spurning mín stendur eftir sem áður, hvaðan kemur þessu fólki réttur til að hirða af öðrum Íslendingum sjálfsögð borgaraleg réttindi og þröngva þeim í hernaðarbandalag gömlu nýlenduveldanna, ríkja sem þekkt eru fyrir allt annað en þjónkun við minnihlutahópa innan sinna raða? 

[Héðinn Björnsson, 30.3.2009 kl. 09:57]

Fyrsta setningin er: "Við erum sammála um að hagsmunum íslensku þjóðarinnar verði best borgið innan ESB og með upptöku evru." Þessi setning felur í sér að hægt sé að meta hvort hagsmunum þjóðarinnar sé best borgið í eða utan ESB út frá fyrirliggjandi gögnum.

Sé það tilfellið er ekkert því til fyrirstöðu að við tökum umræðuna um þetta efni á núverandi tímapunkti og komum umræðunni frá. Við getum gert það gegnum að leggja á það áherslu í þingkosningum og borið málið fyrir þingið (þeir sem vilja í ESB kjósa Samfylkingu eða Framsókn, þeir sem eru á móti kjósa einhverja af hinum flokkunum.) Einnig er hægt að bera það beint undir þjóðina í atkvæðagreiðslu t.d. samhliða kosningum til stjórnlagaþings.

Ef þú ert á því að ekki sé hægt að meta hvort hagsmunum okkar sé best borgið í ESB án niðurstaðna úr aðildarviðræðum ertu ekki sammmála þessari yfirlýsingu sem þú varst að skrifa undir eða þessarri blogfærslu sem þú varst að skrifa.

[Haraldur Ólafsson (IP-tala skráð) 30.3.2009 kl. 10:04]

Egill.   Í flestum málum má telja eðilegt að meirihluti ráði, enda gæti stjórnun orðið mjög erfið að öðrum kosti.  Þegar um ræðir mannréttindi og önnur grundvallarréttindi borgaranna gengur ekki að 50,1% manna geti ákveðið framsal, ekki síst ef sá litli meirihluti er hugsanlega til staðar aðeins í skamman tíma og við annarlegar aðstæður!.  Eina leiðin til að komast í gegn um þetta mál með einhverri sátt er að setja kröfu um að mjög stóran meirihluta þurfi til að samþykkja verulegt og varanlegt valdaframsal.

[Vilhjálmur Þorsteinsson, 30.3.2009 kl. 11:14]

Héðinn, við sjáum ekki að þau mál sem nefnd hafa verið sem helstu ásteytingarsteinar - hagsmunir sjávarútvegs og landbúnaðar, meint "framsal fullveldis" - séu eða verði í reynd þau vandamál sem andstæðingar telja.  En ef það kemur í ljós í aðildarviðræðum, að svo sé, þá endurmeta menn að sjálfsögðu stöðuna.  En það þarf að ganga til viðræðnanna af fullum ásetningi og einurð um að ná góðum aðildarsamningum, og að þeim loknum sér þjóðin fyrst kost og löst á málinu í samhengi.

[Héðinn Björnsson, 30.3.2009 kl. 14:21]

En ef þú telur þig geta metið þetta í dag af hverju ertu þá á móti því að um málið verði kosið í kosningum? Ert þú að einhverju leiti betur settur til að meta hvort umsókn að ESB sé góður kostur fyrir Íslendinga en aðrir kosningarbærir Íslendingar?

Ég tel að þið þurfið að safna meira fylgis við aðildarumsókn áður en vit er í að reyna að keyra hana í gegn. Þið vinnið gegn eigin hagsmunum og málið okkur upp í horn í samskiptum við erlendar þjóðir ef þið þvingið í gegn aðildarumsókn gegn vilja meirihluta þjóðarinnar sem hún mun síðan hafna. Áður en við sendum þau skilaboð til Norðmanna að við ætlum að stinga þá af og demba okkur í ESB þurfum við að vera alveg viss um að það verði niðurstaðan, en velvild Norðmanna og ESB er ein af forsendum þess að það er til eldsneyti í landinu og þar að leiðandi matur.

Að lokum vil ég benda á að eina leiðin til að ná þessu máli í gegnum þingið án þjóðaratkvæðagreiðslu er ef Samfylking og Framsókn ná hreinum meirihluta saman. Með því að keyra á að fara verði beint í viðræður án þess að vera tilbúin að leysa þetta í þjóðaratkvæðagreiðslu verðið þið að búa ykkur undir að slíkt er hættuspil sem gæti valdið því að ekkert gerðist í þessum málum á næstakjörtímabili ef þessir flokkar ná ekki meirihluta á þingi. Með því að gera komandi kosningar að atkvæðagreiðslu með eða á móti ESB verðið þið að búa ykkur undir að geta tapað slíkum slag jafnvel á allt öðrum málefnum.

[Egill M. Friðriksson, 30.3.2009 kl. 15:05]

Haraldur og Héðinn: Samkvæmt nýjustu könnun Gallup vilja 3/4 hefja aðildarviðræður við ESB (Heimild: http://mbl.is/mm/frettir/erlent/2009/03/30/ulpum_stolid_a_gotu/). Eins og staðan er í dag er meirihluti á móti aðild en stór meirihluti vill aðildarviðræður. Þess má geta að samkvæmt könnunum sem SA hefur gert undanfarinn áratug þá hefur meirihluti nánast alltaf verið hlynntur viðræðum. Hvar sjáið þið réttlætið í því að láta minnihlutann ráða förinni?

Héðinn: Fólk kýs vanalega ekki út frá einu málefni, í þessu tilviki ESB. Af tölunum hér ofan að dæma þá er meirihluti hlynntur aðildaviðræðum - samt hefur meirihluti aldrei kosið Samfylkinguna. En ef að kosningarnar ættu á annað borð einungis að snúast um ESB þá þyrfti amk. að klára viðræður fyrst - sjá hvað þær bjóða upp á og síðan kjósa. 

[Vilhjálmur Þorsteinsson, 30.3.2009 kl. 15:05]

Það er nokkuð til í þessu hjá þér Héðinn, en ég hef áhyggjur af því að fyrri atkvæðagreiðslan myndi aðallega snúast um ímyndaðar hættur og hræðsluáróður, og það væri ömurleg niðurstaða að afgreiða málið á grundvelli slíks.  Fyrst þegar væntanlegur aðildarsamningur liggur fyrir, veit fólk fyrir víst hvað verið er að kjósa um.

[Héðinn Björnsson, 31.3.2009 kl. 10:34]

Bið þig Egill að vitna betur í heimildir. Þessi frétt snýrst um úlpustuld Þessi skoðanakönnun er frá því í miðjum mars en þá voru um 55% af þeim sem tóku afstöðu á móti því að Ísland sækti um aðild að ESB. Það er svo spurning hversu stór hluti Íslendinga telja að það sé munur á að sækja um aðild eða fara í aðildarviðræður (sem er að því er ég best fæ séð sami hluturinn).

Hvað varðar ímyndaðar hættur og hræðsluáróður að þá verðið þið að vinna á honum áður en kemur að aðildarumsókn því annars fer hér allt í bál og brand. Ef meirihluti þjóðarinnar telur að verið sé að framselja fullveldi landsins og gefa Brussel fiskimiðin þegar samþykkt yrði að sækja um aðild að ESB myndirðu sjá uppþot á Íslandi. Ástandið á Íslandi er viðkvæmt og kosningar eru besta leiðin til að ná fram vilja þjóðarinnar í þessu máli með friðsamlegum hætti.

[Egill M. Friðriksson, 31.3.2009 kl. 18:14]

Héðinn: Haha ég tók ekkert eftir þessu! Heyrðu rétta heimildin er hér: http://www.mbl.is/mm/frettir/esb/2009/03/08/flestir_vilja_adildarvidraedur/

Það er rétt eins og þú segir að hægt að gera ráð fyrir mörgu með inngöngu í ESB. Aftur á móti hafa þjóðir hingað til alltaf fengið einhverjar undantekningar. Ef að ferli allra væru eins þá sé ég ekki tilganginn með aðildarviðræðum. Þess vegna er munur á að vilja aðild beint og að óska eftir aðildarviðræðum. 

[Ólafur Jens Sigurðsson (IP-tala skráð) 1.4.2009 kl. 21:30]

Fyrst aðhaldið er svona gott innan ESB af hverju eru nokkrir af nýjust meðlimum bandalagsins núna í sömu sporum og við? Því miður, sé ekkert við ESB sem hefði getað bjargað okkur hérna.