Ayaan Hirsi Ali og algild mannréttindi

Það var mjög fróðlegt að fylgjast með viðtölum Kastljóss og Egils Helgasonar við Ayaan Hirsi Ali, þá hugrökku hugsjónakonu.  Það læðist hins vegar að mér sá grunur að margir misskilji boðskap hennar varðandi fjölmenningarsamfélag, innflytjendur og íslamstrú og haldi að hún sé einfaldlega á móti þessu öllu þrennu.

Ef ég skil Hirsi Ali rétt er hún fyrst og fremst að vara við því að við sýnum undanlátssemi varðandi almenn og algild mannréttindi, í nafni umburðarlyndis og fjölmenningarsamfélags.

Ég aðhyllist ekki siðferðislega afstæðishyggju og tel mannréttindi eiga að vera almenn og algild, t.d. með vísan til Mannréttindasáttmála Sameinuðu þjóðanna.  Ég er einnig gagnrýninn á trúarbrögð og mannasetningar hvers konar.  Ég vil því engan afslátt frá mannréttindum gefa og tel að allir verði að virða þau, óháð uppruna eða trúarbrögðum; hvorki Kóraninn, Biblían né önnur fornrit eiga að gefa mönnum afsakanir til að brjóta á meðborgurum sínum, kúga þá eða svipta þá rétti sínum.

En að því gefnu tel ég enga hugmyndafræðilega ástæðu til að hefta frelsi fólks til að flytja og búa þar sem það vill og getur.  Ég geri mér grein fyrir að praktísk vandamál geta fylgt fólksflutningum en þau eru þá nákvæmlega það: praktísk vandamál til að leysa.  Við erum öll menn með sömu grundvallarlanganir og þrár í lífnu.  Einbeitum okkur að því sem sameinar frekar en því sem sundrar.  Og í því sambandi væri ógalið að beina umræðunni að hinum eyðileggjandi og sundrandi áhrifum trúarbragða, eins og Ayaan Hirsi Ali hefur sjálf gert, en hún er trúleysingi.

Athugasemdir

[Ingunn Ólafsdóttir (IP-tala skráð) 15.9.2007 kl. 16:11]

Er sammála þér í þessu Vilhjálmur.

Þessi mál verða allt of oft að einum kaotiskum hrærigraut í umræðunni og örugglega líka í hausnum á fólki, og öllu er blandað saman, trúarbrögðum, kynþáttafordómum,mannréttindum.... Fólk er einnig oft einfaldlega óupplýst og með hræðsluna við það óþekkta sem skjöld í þessari umræðu um innflytjendur. Einnig er allt of fljótt rokið til og byrjað að tala um kynþáttafordóma og mismunun sem að kannski hafa ekkert með málið að gera. Þetta gerist því miður, sér maður bæði hjá íbúum landa sem að taka á móti innflytjendum og innflytjendunum sjálfum, og andrúmsloftið verður því oft miður gott í þessum löndum, td eins og er á sumum norðulöndunum. Við þurfum að geta skilið hismið frá kjarnanum og vinna saman að þessum málum, ég trúi því líka að við eigum að geta búið saman og gætt hagsmuna flestra. En mikil vinna er fyrir höndum, vona að íslendingar noti sér þær fyrirmyndir sem eru í löndunum í kringum okkur...Þetta verður manni mikið hjartans mál þegar maður hefur prufað á búa á stað þar sem að allt er komið í bál og brand og lígsgæði fólks farin að skerðast hreinlega vegna þessara mála.

Kveðja Ingunn

[SÞorsteinsson (IP-tala skráð) 15.9.2007 kl. 16:28]

Í flest er ég sammála þér hvað varðar trú og öfgar sem henni tengjast,en í innflytjendamálum finnst mér a ðvið þurfum að stíga varlega til jarðar og megum ekki
slaka á klónni hvað þau mál varðar.
Ég tel okkur eða innflytjendum engin greiði gerður með óheftum innfluttningi.
Fólk sem rífur sig upp í heimalandi sínu og flytur til framandi landa til að skapa sér og sínum betra líf,verður að vera tilbúið að gangast undir lög og siði lands þess er það 
flytur til og aðlaga sig landi og þjóð,ég tel engu skipta þjóðerni eða litarháttur viðkomandi,manngæði og virðing fer ekki eftir því heldur einstaklingnum sjálfum.

[halkatla, 15.9.2007 kl. 18:15]

ég hreinlega gæti ekki verið meira sammála jafnvel þó að mig langaði til þess, sem mig langar ekkert sérstaklega

[Bryndís Júlíusdóttir (IP-tala skráð) 16.9.2007 kl. 09:43]

Nágrannaþjóðir okkar á Norðurlöndunum hafa nú þrjátíu ára reynslu af innflytjendum Araba og Tyrkja og fleiri þjóðir hafa bæst í  hóp innflytjenda eins og t.d. Sómalir sem flúðu land sitt vegna stríðs.  Reynslan sýnir að það eru ákveðir þættir í þessari menningu sem eru mjög svo ólíkir frjálsræði okkar Vesturlandabúa.  Svo ólíkir að nánast er þarna gjá sem virðist óbrúanleg.  Þetta er það sem Ayaan Hirsi Ali er að tala um og varðar t.d. réttindi og afstöðu til kvenna sem einkennist mjög af feðraveldinu hjá þessum þjóðum.  Þessir menningarheimar eru mjög svo ólíkir okkar og þar er viðurkennd kúgun sem við hér myndum aldrei sætta okkur við. Það er enginn að segja að þetta sé óleysanlegt en staðreyndin er samt að margir af þessum innflytjendum kæra sig ekki um að láta af þessum hefðum.  Jafnframt líta þeir niður á okkar frjálsu siðvenjur.  Við getum ekki verið svo barnaleg að halda að bara vegna þess að innflytjendur flytjast hingað að þeir séu tilbúnir til að kasta sínum siðvenjum.  Það eru líka ótal dæmi um að þeir innflytjendur sem vilja aðlagast vestrænum þjóðfélögum og brjótast undan viðteknum reglum svo sem Múslímakonur sem velja sér annan maka en fjölskyldan hefur valið henni þ.e.maka af öðru þjóðerni þær eru iðulega drepnar af fjölskyldu sinni.  Þær hafa ekki leyfi til þess og eru réttdræpar samkvæmt þessum siðvenjum.  Þetta er nokkuð sem við eigum mjög erfitt með að skilja. Þetta er bara eitt lítið dæmi.  Trú eða ekki trú.  Öfgarnar eru alltaf slæmar.  Svo er það annað að skoða orsökina fyrir öllu þessu flóttafólki en það eru þessi ömurlegu stríð.  Margt af þessu fólki neyðist til að flýja ömurlegar aðstæður vegna stríðs.

[Vilhjálmur Þorsteinsson, 16.9.2007 kl. 14:27]

Ég spyr stundum sjálfan mig um tölfræðina í þessum sögum sem blásnar eru upp í síðdegisblöðum af heiðursmorðum og uppákomum í hópi innflytjenda.  Ekki má gleymast í samanburðinum að það koma upp alls konar miður geðsleg glæpamál meðal "innfæddra", þ.e. þeirra sem hafa sömu menningu og meginþorrinn.  Það er misjafn sauður í öllu fé.  Þeir sem eru haldnir vægri eða stækri kynþáttahyggju grípa stundum svona smásögusannleik (anecdotal evidence) og nota hann í stað raka.

Aðalatriðið er að það sé klárt að kúgun verði aldrei réttlætt eða leyfð, hvort sem er á grunni trúarsetninga, hefða eða annars. 

Það er hins vegar góður punktur hjá Bryndísi að það má spyrja oftar um orsakir flóttamannavandamála, sem liggja í trú á stríði og valdbeitingu. 

[Baldur McQueen (IP-tala skráð) 16.9.2007 kl. 21:12]

Ég tek undir það að trúarbrögð eru ótrúlega sundrandi fyrirbæri.  Tel samt líklegt að þau verði alltaf til staðar og því mikilvægara að tala fyrir því að menn geti lifað saman í sátt og samlyndi burtséð frá trúarbrögðum eða trúleysi.
Sjálfur hef ég hugmynd um hvort það sé einhver þarna upp eða ekki og á því erfitt með að staðsetja mig á trú/trúleysiskvarðanum.

Varðandi interfaith ástarsambönd verð ég að benda á að sjaldan er sagt frá þeim velheppnuðu í fjölmiðlum.  Enda þættu það eflaust dálítið undarlegar fréttir. 
Hvað tölfræðina varðar benti ég einhvern tíma á að, að meðaltali 13 "sæmdar"morð eru framin árlega hér í Bretlandi, meðan 22.000 manns látast af völdum áfengis.  Í guðanna bænum ekki líta svo á að ég sé að afsaka "sæmdar"morð með þessu, því fer fjarri - ég vil einungis benda á að útfrá tölfræðinni er ýmislegt sem mætti ræða meira um í fjölmiðlum en gert er.

Þannig er það nú bara að menn mættu alveg slaka á í fullyrðingum þess efnis að allt sé að fara í bál og brand í útlandinu vegna innflytjendamála.  Vissulega eru vandamál, en þeim er verið að vinna í og gengur bara bráðvel á mörgum vígstöðvum.  Tek annars undir með Bryndísi varðandi ástæður þess að fólk neyðist til að flýja sín heimalönd.
Kannski mætti fara að prófa Marshall módelið, fremur en það Bush-íska?

Enda þetta innlegg mitt með tengli á jákvæðar fréttir.  Ekki er vanþörf á

[Kári Harðarson, 17.9.2007 kl. 15:39]

Það er vissulega misjafn sauður í mörgu fé.  Vinur minn í Bandaríkjunum var frá Íran, múslimi að nafninu til en afskaplega afslappaður sem slíkur.  Hann samlagaðist amerísku samfélagi afskaplega vel, var kvæntur amerískri konu og starfar sem tannlæknir.  Við skulum segja að hann hafi verið álíka mikill múslimi og ég er kristinn.

Hann var vel menntaður og kom frá Tehran.  Hann benti á að landið hans væri stórt og þar væri nóg af fáfróðu, illa upplýstu fólki með öfgaskoðanir.     Reyndar veit ég líka um fullt af þannig ameríkönum.

Það eru ekki útlendingar sem er vandamálið heldur fáfræðin.  Fáfróðir öfgasinnar eru til mikillar óþurftar, hvort sem þeir eru aðfluttir útlendingar eða hérbúandi íslendingar.

Við þurfum því að halda heimskingjum hér í lágmarki, bæði með því að uppfræða þá sem fæðast hérna og bjóða heldur ekki fleiri heimskingjum hingað en við ráðum við að uppfræða

[Vilhjálmur Þorsteinsson, 17.9.2007 kl. 16:47]

Amen, Kári